Day53 6。8。2014(東北之旅Day6 弘前)

終於有時間update啦，聽日已經9月啦，時間真係過得好快。。

阿TEL明明喺呢度朋友都唔多個，屋企人又唔係身邊，仲要只得負數冇收入，點解會咁開心㗎呢。。

難道阿TEL真係明白咗呢啲咁深懊嘅做人道理，定係佢真係一個冇腳嘅雀仔(O_O)？！

第二日喺弘前，stay喺同一個host度多一日，阿TEL終於唔使背住啲嘢周圍去，阿TEL話佢承認，去旅行都真係幾攰，咁樣走走篴篴一個禮拜，連暗瘡都走晒出嚟>< 點樣孭背囊環遊世界吖！加油呀阿TEL，我都想環遊世界㗎！等你啦！

一早要返工嘅host太太，整咗飯團畀我地食。

仲有真係整出嚟嘅味噌湯，唔係好似阿TEL咁沖水。

阿host Yusuke先生比我地影佢屋企相，咁我地就介紹吓呢個host啦。佢係一個勁鐘意beatles同Elvis時期嘅嘢嘅人，佢除咗有好多唱片，結他，仲有好多vintage衫，間屋都好型㗎。(仲禁止佢太太擺任何公仔同得意嘢出嚟破壞氣氛~！)

呢間屋好大呀！租只係60000yen，各位香港朋友如果想住大屋可以林吓搬嚟弘前。

屋主一部份嘅vintage衫。

今日放假嘅屋住車我地出去玩！弘前因爲人少，冇鐵路，冇車好多度都唔到㗎。真係好彩喇

唔好彩嘅係成日都落住啲雨。呢度係弘前城，阿host對於佢嘅地方真係充滿愛，佢不停咁話要睇櫻花嘅話嚟弘前城一度就夠晒，因爲呢度啲櫻花全日本最靚喎。哈哈，佢不停叫我地春天要再返去。

個城今年年尾會搬位！真係㗎，唔信自己查吓。

晏晝食呢度出名嘅蕎麥麵

阿TEL唔記得影食蕎麥麪後送嚟嘅「蕎麦湯」，其實係淥完蕎麥麵啲水，飲法係加啲浸蕎麥食嘅豉油落去然後飲，聽講好健康㗎喎。味就係豉油味喇冇乜特別。

呢啲都係真係以前留落嚟嘅建築物

有間茶室！

同阿host Yusuke傾咗好多好多關於日本同香港同中國嘅嘢，嚟咗日本一段時間，同人傾親偈冇論係乜國人都冇人對中國有好感，所以阿TEL都永遠只會話自己喺香港人，認識多少少嘅人可能都明白道有乜分別，但好大部份人都覺得即係中國，即係成日整假嘢，整啲劣質嘢，比啲過期嘢人食，去人地地方大聲夾惡，唔守規矩嘅中國人。阿TEL亦都係辨解唔道，事關呢啲都係事實，而且香港人都受緊，而且同呢啲可以被開嘅人唔同，阿TEL要返去繼續受。老實講，回歸17年，香港冇能力將大陸變得更國際文明，人嘅素質更高，只有大陸將香港搞都笠笠亂，大量冇唸住要貢獻剩係唸住嚟攞着數嘅大陸人湧入嚟，阿TEL自問冇本事改變12億人素質，比人圍剿，走爲上着會唔會係唯一辦法。Yusuke不停話阿TEL應該係個日本人，又叫阿TEL搵個日本人結婚，阿TEL只有傻笑。。。(-__-") 即係咁，有頭髮邊個想做嘞哩呢。如果日本可以移民，阿TEL話佢一定會唸，可惜冇呢個選擇。

好靚呀，人又少

嚟到青森一路都冇食過蘋果嘅我地，食番個蘋果批補數，仲有好好味嘅蘋果汁。

弘前nebuta 祭嘅wataru 尺寸float！

曾經搭五能綫停過呢個站並且唸住都唔會再嚟嘅五所川原（ごうしょうがわら），距離弘前45分鐘，host特登車我地去睇呢度嘅nebuta 祭

呢度嘅nebuta嘅特點就係高！最高有6層樓度

呢隻係而家日本細路最興嘅「妖怪ウォッチ」

同唔度佢合照，但送咗個Like比我地嘅狗頭人

出現啦最高嗰個！

唔同地方嘅nebuta真係有啲唔同㗎，有時間大家都唔好剩係去青森市睇啦

屋主太太終於同我地解釋乜叫nebuta 祭，「眠たし」(nemutashi)即係眼瞓咁解，叫叫吓就叫咗做ねぶた(nebuta)，呢啲叫nebuta嘅float喺條街流過，除咗祈福之外，就係要另到係夏天成日恰眼瞓嘅大家要精精神神啦。

跟住去食呢度特別嘅拉麵，啲湯係魚湯，仲有呢啲攣攣嘅麵。呢間舗入面係超級暗㗎，打晒燈先影到呢幅相。

事關呢間舗係架貨車搭出嚟㗎

係弘前好開心嘅兩日，多謝呢對好好人嘅日本夫婦。我地會再返嚟㗎！